بحبك يامه…و ندمان
بقلم: رباب سمير غانم
كبرتي يامه و دارت بيكِ السنين
ونا في الغربة مستني
اكبّر المال و البنين
نسيت إزاي حكاوينا
و قعدتي علي فرشتك
وقت العصاري مايجينا
و نتلم علي طاولتك
إزاي يامه مش شايف
ضهرك اللي انحني
علي مر السنين انْتني
بيقولوا حلوة هيئتي
طب مين السبب فيها
عشان تطلع بكامل معانيها
وقت تعبك مش موجود
طب إزاي؟
وانتِ سبب الوجود
عاوزك بس تعذريني
علي تقصيري في خدمتك
علي جرحك وقت محنتك
مش قصدي يامه أخذلك
ولا سيب جرحك يألمك
مش شايف نفسي غلطان
مع إني أكيد ندمان
و طول الليل سهران
أفكر فيكِ و سرحان
مقصدش ياه الجفا
ولا البُعد اللي اتنسى
الدنيا خدتني آه
بس إنتِ
برده موجودة
جوا قلبي محفورة
سامحيني يامه علي اللي فات
و تعالي ننساه بالساعات
دي علاقتي بيكِ مكملة
مع عيالي متممة
أكيد لازم أبرك
دنا ابنك اللي منك
دا كل اللي وصلتله
انتِ السبب فيه
ربي يديمك ليا
جنة بين ايديا
اترك تعليقاً