كلمات الشاعر: حمدي عبدالوهاب
زفة شهيد
يا دمعة في عيون الأم
يوم رحيلك يا شهيد
قلبها من الهم ما يلم
وصورته في خيالها بتعيد
راحت سندها.. راح ضلها
والبيت بعده بقى وحيد
كانت تنادي: فين ابني؟
والصوت يرجع رعيد
ورضيعك يتلفت شمال ويمين
عيونه تبكي زعلانين
فين حبيبي قلب الحنين؟
فين اللي كان يضحكه؟
ويلاعبه في كل حين؟
مش لاقي حضنه في المكان
ولا صوته اللي كان أمان
تبكي عيونه وصرخته
تزلزل قلب أي إنسان
إيه ذنبه في دنيته
يعيش مرارة الحرمان؟
وأبوك مكسور في نظرته
لكن جبينه مرفوع أكيد
يقول: ده ابني.. ابن الرجولة
كتب البطولة بإيد حديد
ده ابني اللي عاش راجل
ومات واقف وكان سعيد
خلى اسمه فوق الراية
وبدمه صان العهد والوعيد
وصحابك يوم ما ودعوك
كانت دموعهم نار وحنين
حضنوا النعش وقالوا: وداع
والقلب رافض يستكين
ولما نادى صوت الناس:
شهيد.. شهيد.. يا شهيد
اتبدل الحزن في عيونهم
فخرا وإيمانا ويقين
الزفة عدت في الدروب
والطبل دوى في البلاد
كل الحواري فتحت أبوابها
والناس خرجت للجهاد
لا بيت سكت ولا شارع
إلا وارتفع فيه النشيد
والراية فوق الرؤوس
بتقول: هنا مر شهيد
التابوت فوق الكتف عالي
مرفوع بعزة لا تحيد
مغسول بنور الطهر
ومعطر بالورد الفريد
واسمك على كل لسان
يا غالي يا ابن المجيد
مشيت وخليت وراك
سيرة بطل وعهد جديد
وقبل ما تدخل دارك
سمعنا صوتك من بعيد:
عدوني ع الدار يا صحاب
نفسي أشوف كل ما أريد
نفسي أشوف أمي مرة
وأطبع على إيدها سلام
وأشم ريحة بيتنا
وأحضن صغيري قبل المنام
لفوا على البيت بحب
والصمت كان أقسى كلام
الأم صرخت: يا ضناه
ورد الصدى: يا ضناه
والأب واقف في مكانه
شايل جبال من الآلام
رافع راسه رغم وجعه
وقلبه بيتقطع حطام
الأم قربت للجنازة
والدمع سايل بانهيار
لمست كفوفه وقالت:
نومك هنا يا ابني.. أنوار
نومك هنا يا نور عيني
يا سندي وقت الانكسار
كنت الأمان في ليلي
وكنت للبيت جدار
والطفل نادى من بعيد:
يا بابا.. يا بطل.. يا حنون
ارجع لنا حتى في المنام
خلي الحلم يجمعنا ويكون
احكي لي عن نصرك يا بابا
وقولي لي: ليه ما رجعتش؟
أنا لسه مستني ضحكتك
ولسه على الباب ما قعدتش
وصوت الطبول بيودعه
بالتكبير والدعاء المجيد
والأرض تهمس في سكون:
نام في سلام يا شهيد
نام يا شهيد واطمن
إن الدم عمره ما يضيع
اللي ضحى بروحه لأجلنا
يفضل في قلوبنا شفيع
مشاركة عبر واتساب
مشاركة عبر تويتر
مشاركة عبر فيسبوك