صرخة فقير 

صرخة فقير 

الغلاء ده كله ليه؟

الفقير هيعمل إيه؟

الهموم زادت عليه

خايف من يوم لو يجيه

لما تتكتف إيديه

والدنيا تسود في عينيه

ويبقى صيدة للغيلان

والغيلان طبعًا كتير

بيعيشوا على دم الفقير

ما يعرفوش كلمة ضمير

هيصطادوه ويفصلوه

ويصنعوا منه الهوان

يعملوه إرهابي ماشي

تاجر سموم برضه ماشي

يبيعوه أعضاؤه ماشي

عرضه.. شرفه.. دينه.. ماشي

كله ماشي.. كله ماشي

الظلم فاشي.. الظلم فاشي

كل ذنبه إنه فقير

والفقير زي الضرير

لو ماحدش خد بإيده

سهل يقع جوة بير

ويروح ضحية مالهاش دية

ويبقى صاحب كام قضية

ويطلع عنه كام إشاعة

وتنتشر في نص ساعة

والسكاكين عليه بتكتر

زلازل بقوة سبعة ريختر

والغريب من ناس جيرانه

اللي شافوا سنين هوانه

يقولوا عنه كان حرامي

وفاتح بيته للدعارة

وزوجته ست مش تمام

وبناته عشاق للغرام

وكان بيصنع القنابل

وكلام كتير حابل ونابل

ويبقى ضاع وولاده ضاعت

ويبقى سيرة ريحتها فاحت

والمرار يزيد مرارة

يا ناس حرام.. يا ميت خسارة

وهو كان الفقر طحنه

يا ناس حرام ننهش في لحمه

الدموع في عينيه بتجري

كل عين دموعها تهري

عينيه بتبكي وتشكي حال

عايزة تسأل ميت سؤال

سؤال بالعين الشمال

ليه يا ناس حالنا مال؟

سؤال بالعين اليمين

للحكومة والمسؤولين

هيقول لمين؟ ويعيد لمين؟

هما فين؟ وهو فين؟

يا رب يا معين يا عليم

ارحم عبادك المستضعفين