زجل: العناد_للشاعر: حمدي عبدالوهاب
يا بت يا هبلة وموكوسة
إيه غيّّر أحوالِك؟
قاعدة بتقوّري كوسة
ولا حد شاغل بالِك؟
جوزِك يخطب عروسة
وجمالها فاق جمالِك
ما هو إنتِ أصلك منحوسة
وعنادِك زاد في دلالِك
بيحب بت مفعوسة
عايشة فن وإتيكيت
وإنتِ بت منحوسة
وعنادِك خرّب البيت
يقولك: «اديني بوسة»
تقوليله: «امشي ع الغيط»
وتردّي بكلمة معكوسة
وتهدي البيت والحيط
أعذارِك أوهام مرصوصة
وحججك أوهام فاضية
وصاحبة خُطط مدروسة
وبعندك تدي له القاضية
مرة لوسة ومرة نوسة
ومرة كلامك شتات
تعملي من الحبة قُبّة
وتكبّري كل الحكايات
لا كلمة منك مدروسة
ولا خطوة في مكانها
والحكمة عندك مغموسة
والعند سيد أحكامها
فاكرة إنك بالمكابرة
تكسبي كل الجولات
وإن اللي يترك حقه
تتفتح قدامه جهات
العند نار مفخوسة
لو مسكت في الحطب
تخلي المحبة مدهوسة
وتفتح باب لكل العطب
والقلب لو شال قسوة
يتعب من طول السكات
والبيت لو غاب عنه الصفح
يعيش حالة الممات
يا بت كفاية حوسة
العمر مش مستاهل عناد
خلي المودة مدروسة
وخلي التسامح زاد
أعذارِك أوهام مرصوصة
والبيت مش حيطان وببان
وخُططِك كلها مدروسة
وجوزك صاحي مش نعسان
إن قالك: «اديني بوسة»
ليه تخلي فكره حيران
اصحي يا أختي يا موكوسة
دا البيت أجمل كيان
اوعي تزيدي في عنادك
دا عنادك خرب البيت
دا حبك يزيد دلالك
ودلالك يرفع الحيط
خليكي دايما عروسة
ولا تحطي النار ع الزيت
العقل دايما زينة
والزينة تجمل البيت
اوعي يشوفك مقموسة
ده القمسة بتهد الحيط
سيبيك من شغل الكوسة
ولا تحطي النار ع الزيت
وإن قالك: «اديني بوسة»
دي محبة تجعل البور غيط
مشاركة عبر واتساب
مشاركة عبر تويتر
مشاركة عبر فيسبوك