بقلم شيماء النجار
مش كل سكوت معناه رضا، ومش كل اللي بطل يتكلم يبقى خلاص مابقاش فارق معاه.. ساعات السكوت بيكون آخر مرحلة بعد كلام كتير، وعتاب أكتر، ومحاولات متكررة لإنقاذ حاجة كان نفسه تفضل حلوة.
في ناس بتسكت مش لأنها ضعيفة، ولا لأنها مش قادرة ترد، لكن لأنها اكتشفت إن الكلام مع الشخص الغلط بيضيع، وإن العتاب لو اتكرر كتير بيفقد معناه، وإنك مهما شرحت وجعك، مش هتقدر تخلي حد يحس بيه لو هو مش عايز يحس من الأساس.
يمكن كنت مستني سؤال بسيط، اهتمام من غير ما تطلبه، مكالمة في وقت صعب، أو حتى كلمة تطمنك إنك لسه في بال حد. يمكن كنت بتفرح بأبسط التفاصيل، وتعتبر الرسالة الصغيرة إنجازًا كبيرًا، وتفضل تبرر غياب اللي بتحبه، وتقول أكيد مشغول، أكيد عنده ظروف، أكيد مش قصده.. لكن الحقيقة إنك كنت بتدور على مبررات لغياب الاهتمام أكتر ما كنت بتدور على الاهتمام نفسه.
ومع الوقت، بتتغير حاجات جواك.. مش بتكره، ولا بتنتقم، ولا بتقرر تأذي حد، لكن بتتعلم تبعد بهدوء، وتبطل تستنى، وتوقف جري ورا ناس مش بتتحرك خطوة ناحيتك. بتفهم إن العلاقات مش المفروض تكون طرف بيحاول طول الوقت وطرف تاني متعود ياخد من غير ما يقدم.
اسمع نصيحة على الماشي.. متستهلكش قلبك في إثبات إنك تستحق الحب والاهتمام. متفضلش تطرق باب اتعود يفضل مقفول في وشك، ومتخليش غياب حد يخليك تشك في قيمتك. أنت تستحق ناس تسأل عليك من نفسها، وتفرح بوجودك، وتفتقدك لما تغيب، مش ناس ماتحسش بيك إلا لما تبطل تقدم لهم كل حاجة.
خليك طيب، بس مش على حساب نفسك.. خليك جدع، بس اعرف إمتى توقف.. سامح لو قلبك قادر، لكن متكررّش نفس الوجع بحجة إنك بتحب.
لأن مش كل اللي سكت نسي، فيه ناس سكتت لأنها قالت كل اللي عندها.. ومابقاش جواها غير إنها تحافظ على اللي باقي منها.
قولنا في التعليقات.. هل سكوتك كان راحة، ولا كان آخر محاولة بعد تعب طويل؟
