قصيدة بالعامية للشاعر حمدي عبدالوهاب (مصر)
بين الوعود المكتوبة وغلاء المستلزمات وسيطرة التجار.. صرخة شجية تلامس واقع المزارع المصري في قصيدة عذراً لم يعد للفلاح أي عيد
عيد الفلاح
قالوا: النهارده عيدك
قلت لهم: عيدي فين؟
قالوا: اضحك يا فلاح
قلت: أضحك على مين؟
قالوا: قوم خدّلك صورة
جنب الغيط والسنابل
ألاقي لساني يقول:
فين عيالي المظلومة؟
من الفجر تصحى بدري
وفي المناصب مقهورة
ابن الباشا بقى باشا
وابن الفلاح مش بيه
ليه اللي يتعب في الدنيا
الدنيا تحط عليه؟
فتّشت جيوب جلابيتي
لقيت الجيب له خُرمين
قلت يمكن قرش يِطلع
لقيت الهوا ساكن من سنين
قالوا: الدعم وصلك
قلت: وصلي فين؟
قالوا: موجود في الدفاتر
قلت: والدفاتر بتاكل طحين؟
قالوا: اصبر يا فلاح
الصبر آخره فرج
قلت: صابر من بدري
والدَّين بيجري حَرَج
أرمي التقاوي في الأرض
ألاقي وسوسة وحرمان
تركب جوّه راسي
والهم زي الطوفان
أزرع حبة قمح
وأستنى عليها شهور
أقوم ألاقي سعر السماد
ديب كاسر ومسعور
والمبيد واقف يتمنظر
عامل فيها من عِيلة
السنابل ترقص تتمختر
وتموت من قِلّة حيلة
الميّه لها ألف حكاية
والزرعة مش مروية
عايز أرفع الراية
يقولوا: المَرّة الجاية
أقوم وسط الليل أعافر
تطلع مِ الترعة جنيّة
وييجي وقت الحصاد
وتظهر قدامي حرامية
الكل كان عنّي بعيد
دلوقتي بيسقّيني الميّه
بيقول: يا سيد عماد
إنت أساس الحنيّة
واللي يخاف م العفريت
تطلع له ميت جنيّة
يقول: السوق نازل
وفين أجرة العربية؟
سيبك من سعر المحصول
وربك يعوّض المَرّة الجاية
وأوعى لحد تقول
ع التسعيرة ديّة
أصل سعرك عال
ومش محتاجة أذيّة
ألاقي المحصول خلص
والدَّين فاتح ألف باب
دي مش عيشة فلاح
دي نصبة تجار وحرامية
يجنوا هم الأرباح
والفلاح ذِكرى سنوية
وفي عيدي يقولوا:
قوم خدّلك صورة
ألاقي لساني يقول:
فين عيالي المظلومة؟
من الفجر تصحى بدري
وفي المناصب مقهورة
ابن الباشا بقى باشا
وابن الفلاح مش بيه
ليه اللي يتعب في الدنيا
الدنيا تحط عليه؟
أنا مش عايز في عيدي
كلمتين حلوين وخلاص
ولا صورة جنب مسؤول
ولا وردة ولا كاس
أنا عايز لما أزرع
ألاقي حقّي في إيدي
ولما أبيع المحصول
ما أرجعش أستلف عيدي
عايز اللي يزرع اللقمة
يعيش منها مستريح
مش كل ما يطلع سنبلة
يطلع فوق ضهره تجريح
أنا الفلاح يا ناس
مش منظر في احتفال
أنا اللي لو بطّلت أزرع
يتعب حال العيال
فبلاش تقولوا: عيدك
والعيد مجرد كلام
خلّوا الفلاح يعيش يوم
يستاهل فيه السلام
لأن اللي يزرع قوت الناس
ما يستاهلش الحرمان
واللي يِهين إيد الفلاح
يِهين رغيفه كمان
مشاركة عبر واتساب
مشاركة عبر تويتر
مشاركة عبر فيسبوك